jueves, 28 de mayo de 2015

Mal añu de pesca


      Esti añu 2015 va camín de convertise en el peor de la década pa pescaores ruinos como yo.  Salí un total de 4 veces y llevo pescaes solo 2 truches. Al por mayor que se diz. ¿Pa qué voi salir? Salir pa nada...Además, en estos 4 dis, incluyo una salía al coto de Aller el día 5 del presente. Tábemos 7 pescaores y ente toos saquemos 2 truches ruines. ¡Una ruina total! Facíame muncha ilusión esti coto y vini decepcionáu pa casa y con una trucha miserable en tul día.
     Pero ¿qué hosties pasa entós? Pa algunos ye que tovía baxa mui frío el agua por culpa de tanta nieve que cayó esti añu; pa otros, son los paxarones (cormoranes y garces) y los llontros; pa otros, cenciellamente ye que nun les hai.
     En cualquier casu, una ruina de temporá. Ya me apetez sacar la ferramienta del coche y metele a dormir  nel trasteru hasta el añu que vien. Total pa acarrialo en coche nun merez la pena.
                                                                                                                Tante B.

jueves, 27 de marzo de 2014

Comienza la temporá 2014

Como dicía l´añu pasáu; ya tamos ende. Y tamos como casi tolos años, quexándomos amargamente de todo. Cuando nun ye del tamañu raquíticu de les captures, (que te fae volveles al ríu), ye del propiu caudal del ríu y si non de les condiciones atmosfériques.
Entamamos mui bien, con un tiempu estupendu pero xusto a los dos dis torciose y vieno una inverná que me fexo colgar los tarecos nel trasteru hasta qu´abocane y venga una llugaína.
Salí solo dos veces col resultáu escasu habitual: 4 truches, una d´elles de 1/2 kilin pa animame.
Esperando como agua de mayo a que ameyore el tiempu pa retomar el asuntu y dir a variar un poco. Pa los pocos que me siguen en esti blog o pa los munchos pescaores de truches que quieran enterase de les peripecies del pescaor más inútil de la zona, equí taremos desglosando poco a poco dalgún camentariu. Tamién quiero dedica-y estes cosuques míes a un buen amigu que el añu pasaú perdió la vida en esta aficción. Va por ti, Andrés el de Soto.
Que tengamos buena campaña de pesca.

viernes, 29 de marzo de 2013

Ya tamos ende

Nueva temporá y nuevos comentarios. Independientemente de que haiga dalguien que tenga la desastrosa idea de siguime nesti blog, voi continuar escribiendo les mió peripecies ruinoses pe los ríos asturianos. Ye una llabor de la que nun espero sacar nada, pero que me presta.
Los escasos llectores d´esti calamidá de pescaor ya sabeis de sobra que la mió aficción y la habilidá nun van a la par nin munchu menos pero tamién que gano en neciura. A base de ser más pesáu que los plomos de salmón, de vez en cuando traigo daqué pez pa casa.
No que va de temporá, solos cayeren tres pieces. Tengo que dicir a mió favor que salí poco y que el ríu baxa mui esparabanáu de agua. Sin dir más allá, güei vienres santu salí pela mañana con un sol y una temperatura preciosa y hacia les doce apañé una moyaúra como un pitín. Lleva ocho dis ensin abocanar casi. Anduvi per un ríu pequeñacu y llegué a sacar media docena truchuques, pero que ente toes nun facín un cuartu kilu: unes ruindaes de 10 ctms que marcharen otra vez al ríu pa ver si crecen. Y a esperar que venga utru pescaor más hábil que yo. Vendrán dis meyores, digo yo.


miércoles, 30 de mayo de 2012

¿EL TAMAÑU EMPORTA?

Si falamos de truches nun ye qu´emporte o dexe d´emportar, ye que si te trapillen con dalguna pieza que nun dea la midía, faes el día. Si faláremos de la meruca, -per utru lláu cosa de marranonzones-, dicir que ca´un carbura cola suya. Sea como una cacagüesa o como un llitru anís avarilláu.
Ayer trixi pa casa solo 3 truchines. Ruines, sí,  pero col aprebáu de la midía. Nun salen otres. Meyor dicho, sí salen otres pero má ruines entavía. Asina que farteme de devolver al ríu un montón d´esguinos de poco más de 10 ctms.  Yeren tan ruines que pa facer un kliu fadrín falta dos docenes y ayudales con un ladriellu.
 Pero la verdá que diba tiempu que non disfrutaba tantu nel ríu. Si vos cuento que nel espaciu de una hora tendría unes 60-70 picaes, igual quedo curtiu. Yera llanzar y sintir el xingón. Unes veces solo un quitín, otres un sustu mas gurdu que protestaben armando un buen espolín al pinchase y otres un enganchón del que nun yeren de llibrase hasta que isti benevolente pescaor inútil les soltaba esperando que crezcan.  Pa que dempues les pesque utru, de xuru.
Pero a mi gústame pescar sobre too. Sintiles, veles pelear contra el puntal de la caña...Son sensaciones que se tienen o nun se tienen. Esto diferencia que haiga pescaores o alimañeros. Que se cobren les pieces reconozo que ye un buen aliciente, pero ye lo de menos.

sábado, 19 de mayo de 2012

Lo pequeño y lo grande

Siguiendo el conseyu d´un buen amigu, poseme ayer al riu Nalón pela zona sur de la Pola, a la parte baxo la Chalana.  Y ye certero que hai bastante más trucha que p´arriba. Pero tolo que saqué y tolo que picó yera una ruindá total.  Nun valín nin pa´l gatu. Truchines de 10 o 12 ctms y alguna que otra algo mayor pero poco más.
Y nesto que percibo, arrimao a los peñones de la escollera un revuelu  que me llamó la atención. Vaya por fin veo cebase una grande, pensé. Y cuando me pongo a lanzar...asoma enriba un peñón un lluntru con una trucha na boca que daba de sobra la midía y quedase agüeyando pa mi como diciendome:
- Vaya un pescaor ruin tu...mira y apriendi, zoquete.
Abaxeme a buscar daqué regodón amañosu pa solmena-y un morrillazu en medio la cresta a ser posble pero en cuantes que vio movimientu volvió a chapuciar y desapaecióme de la vista.
Les truches que vi yeren ruines pero la llontra tenía un tamañu que bien podía pasar  por una oveya ruina si tratare de vende-yla a dalgún tratante cegaratu nel mercáu. Nunca había visto una nutria tan grande y tan cerquina.
Vini pa casa de vacío. Agora lo que nun vos pueo dicir ye eso de que queden allá pa mañana. Queden allá pa que la llontra cene bien.
Bueno, ellos ye lo que comen y lo mio ye solo pa enreteneme.

lunes, 14 de mayo de 2012

TOMA FÚTBOL

Domingu de tarde. Tarde de fútbol y de tar arremelláu agüeyando pa la tele esperando algo que t´alegre un poco la vida. Pero como nun hai dos en sin tres, el llombardazu del Sporting a la 2ª división taba cantáu desde el día que llego el Zaragoza siendo colista y mos metió el agua en casa. Los del Uviéu tovía tenín daqué esperanza en arreglar una campaña de lluces y sombres. Pero na de na.
Asina que viéndoles venir, aperieme a eso de les 7 la tardi y en vez de quedame apegáu a la pantalla la tele, poseme al ríu como si esto del fútbol nun fuere conmigo. ¡Y el ríu pa mi solu!. Naide nin p´arriba nin pa debaxo.  Daba gusto. Nun saqué más que dos, pero tuvi bastantes picaes y eso de tar entreteníu tamién cuenta.  Tocome devolver al agua media dodena de ruindaes. La tardi féxose mui breve y cuando quixi dame cuenta ya yera casi de nuechi.
Al voler al coche punxi la radio y confirmé lo que ya esperaba: nin Uviéu nin Sporting consiguieren lo que buscaben. Yo pasé una tardi preciosa y nun me enrité delantre la tele. ¿Nun xugarán otra vez güei pa dexame pa mi solu el riu?.

miércoles, 4 de abril de 2012

TAMOS EN CRISIS

Cuando me posé al ríu ya yera más de mediu día. Sé que nun yera la meyor hora pa bañar el merucu, pero    tenía que facelo pa salir de dulda. ¿Hai trucha o tamién tamos en crisis nesto?
Poseme a la altura de Llorío y entamé variar como un posesu. Nun dexé rabión nin corrientuca nin echá decente que nun sintiera retorcese el merucu enfiláu nel anzuelu. Calé a la esplaná debaxo del Cañal hora y media dempués sin necesidá maldita de camudiar el merucu. En tou esi tramu nin siquiera una sola picá. Como si hobiere tao tirando na bañera de casa. Pa entós el putu merucu ya había sacao el títulu superior de submarinista y la especialidá de buceo ente regodones.
Ente que yeren cerca les cuatro la tardi y ente que tenía la fame enriba pisandome el llumbu, plegué y pa casina. De vacío por completo pero satisfechu por la patiaúra que me pegué.
Efeutivamente, la crisis y los recortes debieren de llegar tamién al riu: nun se ve una trucha. Y claro, como tul santu día mos martiricen colos putos recortes,  tamién se recortaren el númberu de merucos a emplegar nesta tarea. Cuando lu quité del anzuelu antes plegar la caña, taba tovía como una rosa y hasta tuvi la sensación de que se taba escoyonando de mi. Bueno, aforro de dir a dar fesoriazos pa buscar más. El que nun se consuela ye porque nun quier y yo voi consolame tola tardi en cualquier espicha del conceyu, que pa eso son munches y mui buenes.